Dam Lai Par Chu I Hmang Chul Dun Ang

By Hriatpuia Pa, Kolasib

Hmangaihna hi changkång taka ngaihtuah kher a ngai lo. Incheina mawi leh ṭha chi hrang hrang te, in leh lo ṭha leh a chhung bungraw man tam tel lo pawhin a inhmangaih theih reng. A nihna takah chuan hmangaihna hi bungrua leh mihring siam chhuah thila innghat a ni lo va. Pathian chauhvin a duan mihring thinlunga inṭan a, hmel mawina leh duhawmna piah lam thlirtu chu hmangaihna hi a ni.

A ni tak tak a sin! Lirthei chhuak thar khalh avanga hmangaihtu hmangaihna chuan dam chhung a daih lo chiang sa a. He khawvela mihring kut leh thiltihtheihnain a siam chhuah neitu a nih avanga a neitu hmangaihtu hmangaihna chu hmangaihna lem a ni a, chutiang thil chu kum tlem teah a chhia a, a rawih a, a chuai leh mai a. Chutianga hman tlâk loh a nih hnuah chuan chu thil avanga hmangaihtu hmangaihna chu a la nung reng bik dawn em ni? Ni lo, chutiang chu hmangaihna a ni lo vang, duhna mai mai a ni chauh pek ang.

Hmangaihna dik tak chuan car chhuak thar a mamawh lo va, bike mawng er a ngai lo va, in chhung bungraw changkång a ngaipawimawh lo. Hmangaihna dika hmangaihtu hmangaihna chuan thuamhnaw thar a mamawh lo va, hair-style thar a ngaihtuah ngai lo. Chutiang zawng zawng ai chuan a hmangaiha nui hmel chu a tan a pawimawh zawk a. Nachhâwkna chak berin a chhâwk theih loh natna tidam turin a hmangaih nui hmel chu a chak tawk êm êm zawk ṭhin.

Another day

Without your smile

Another day just passes by

But now I know

How much it means

For you to stay

Right here with me

Chutiang chu a ni a, i tel lova ni hman a, i nui hmel hmu lova ni khat awm pawh hi rei ka va ti ṭhin tehlul em! Mak êm êm chu maw, i bula ka awm hian hun hi a kal zung zung a, i tel lova ka awm hian hun hi a kal muang leh hle si! Nangmah hi hun vawngtu i ni lo tih ka hria a, mahse, i bula ni khat leh i tel lova ni khat hi darkar sawmhnih leh pali ve ve a ni chung hian, i tel lo ni khat hi a rei êm êm bîk si hi a va mak êm! I bula ka awm lai khan ka tana i pawimawhna leh ka nuna awmzia i neihzia ka hre lo a ni lo, ka bula i awm loh chiah hian chu'ng ka thil hriat te awmze dik tak chu ka thinlungah hian a chiang zual a ni.

The time we spent apart will make our love grow stronger

But it hurt so bad I can't take it any longer

Thu dik tak sawi hi a ṭûl i ti lo a nih pawhin a ngai ka ti tlat a, ka sawi lo thei lo. Kan inkar a hlat zawh poh leh ka hmangaihna che hi a zual em ni tih hi ka inzawt fo ṭhin a, a chhanna pawh a rawn thleng a, 'a dik,' tih bak chhanna ka nei lo. Ka bula i awm khan ka hmangaih êm êm che a, ka duh ngawih ngawih che a. Mahse ka ban phâk lohva i awm a, ka hmuh phâk lohva i awm hian ka hmangaihna che hi a zual a, ka ngaihna che hi a nasa zawk hian ka hre tlat a. Dik tak chuan, ka ngai lutuk che hi ka taksa mai ni lo, ka chhungril, ka ruh chuktuah zawng zawng, a ni lo, chu mai a la ni lo, ka thlîng thleng hian a na vek thei a sin!

Chhuna ni a sat vawl vawl te hian ka ngai ṭhin che a. Mahni hna ṭûl thawk a, buai taka hun ka hman lai hi chuan, ka thinlungah thi ṭhak lo mah la, ka ngaihna che hi tlemin a nêp deuh niin ka hre ṭhin. Zan a lo nih a, khua a thim chiah hian nang ngaih lunglen hi a zual takzet ṭhin. Zan a rei tulh tulh a, a zual tak tulh tulh a! Tukverh puanzar kar aṭanga thla êngin pindan chhuat a rawn chhun ka hmuh ringawt te hian nang ngaih lunglen hi a belhchhah zél a! Thawm dang awm miah lova perhpawng leh khuangchiri hräm thawm chauh ngaihthlâk tur a awm tawh hnu pawh hian ngaihtuahnaah thil dang a lût thei lo. Perhpawng leh khuangchiri takngial pawh hian nang ngaih lunglen zai bâk sak tur an hre lo zu nia!

A thousand miles between us now

It causes me to wonder how

Our love tonight remains so strong

It makes our risk right all along

Things can come and go

I know but

Baby I believe

Something's burning strong between us

Makes it clear to me

Mel sang tam tak kar danah awm mah ila, kan inkara hmangaihna avang hian kan rilru leh ngaihtuahna a inhlat ngai lo tih ka hria a. Engvanga heti êm êma nasaa inhmangaih ta nge maw kan nih le tih hi ka ngaihtuah fo ṭhin. He khawvelah hian thil tam tak ka hmuin ka hre tawh a, ka nunah hian thil tam tak a thleng tawh. Ni a chhuak a, a tla leh a, zan a ni a, a tûkah khua a lo var leh mai ṭhin. Khawvel thil dangte hi chu a rawn thleng a, a liam leh mai ṭhin. Hun pui te pawh hi, tiraw? Krismas a rawn thleng a, rei lo teah a liam leh a. Kum a thar a, Chapchar Kût te pawh kan hmang a, a hun laiin hlimawm viau ṭhin mah se, a liam leh mai ṭhin. Nang ka hmangaihna che hi chu ka nuna a rawn thlen tirh aṭang khan a la kalsawn lo va, nang hi chuan ka hmuh tirh aṭang che khan ka thinlung hi i kalsan ngai tawh lo!

A chang chuan heti hian ka ngaihtuah ṭhin - kan inkar hi a hlain a zau si a, kan inhmangaihna pawh hi hrui rinawm tak angin vuan dunin, thlah loh tum mah ila, hun leh kum a liam ang a, kan inkarah mual tam tak a awm ang a, a reh ve leh mai ang - tiin. Mahse chu chu a dik lo va, ni tin hian a dik lohzia ka hmu thar ṭhin. He khawvela mihring dangten mak an tih leh ni thei pawha an ngaih loh thlentir tur hian he kan inkara hmangaihna hi a chak tawk zo ang em le!? A chang chuan dam chhan luah zawh loh ai chuan thih chilh mai te hi ka duh rum rum a! A mak mang e, dam chhan thih chilh han duh tlat mai chu! Mahse chu chu ka rilrua lo lang ve fo a ni tlat si a ni!

Zan tin ka inngaihtuah ṭhin a. Mut hmunah muhil si lovin ka let ka let a, chhanna awm lo zawhna tam tak ka inzawt a. Sawngsawhlawtna awm miah lo ngaihtuah vak vak chungin darkar tam tak ka hmang ral ṭhin. Hla taka i awm a, i nui hmel hmu pha lova ka awm a, i aw ri pawh ka hriat phâk lohna hmun aṭang hian ka ngaihtuah che a, ka ngaihtuah chang apiang che hian hei hi ka thunawn a ni ṭhin -

I wanna grow old with you

I wanna die lying in your arms

I wanna grow old with you

I wanna be looking in your eyes

I wanna be there for you

Sharing everything you do

I wanna grow old with you

He khawvela ka dam chhung hian nang nena dam lai par hman chul hi ka duh ber a ni a. I ni tin nun hman dan ka hre duh a ni mai lo, tel ve zél ka duh a ni. Ka thawh ve leh aṭanga ka mut thlengin i hmel hmuh ka duh a, min hmangaih taka min enna mit ngei kha ni tin ka hmu duh. He khawvel ka chhuahsan niah pawh i awm nghenga awm a, i hmangaihna kuta min kuah ngei chu ka duhthusam, ka lawm famkimna tur a ni.