Hriatchianna Hlu

By Mafaa Hauhnar

Hringnun hnim hnawk zingah inpal buaiin,

Hruizâmah sil-awng khawpin lo inpal thlu ila,

Tho leh thei tawh lovin,

Ka kiangah i lo awm ang em,

Min kai tho va, mi bawihsâwm turin?

Lungngaihna khur thûk takah tângin,

Beidawngin indawm kun tlawk tlawk ila,

Inham chhuah lehna reng hre tawh lovin.

I ṭanpuina kut i lo phar chhuak ang em,

Harsatna leilâwt ata min khai chhuak turin?

Mipui pungkhawm zingah mualphona khumin,

Men ngaihna pawh hre lovin hawihai ila,

Ka kiangah i lo ding ang em,

Min hliahkhuh turin?

Engah nge he'ng thil lawi lo mai mai hian min tihbuai a,

A chhânna ka hriat sa reng zawhna,

Ka zawh nawn, ka zawh nawn che le?

Khawvel awm tâwp thleng pawhin,

I hmangaihna chuan hlimthla angin

Khawi kipah pawh min zui zel dawn si a!

(He hlahril hi 'The MIZO Vol. II No.1' (March, 2014)-ah tihchhuah a ni. -Ed.)