Mizo Nih Tinuamtu Rokunga

By B. Lalthangliana

Kum zabi 20-na (1900-1999) chhunga Mizo zinga hla phuah thiam ber "Poet of the Century"-a thlan ROKUNGA chanchin leh a hla phuah te, a hlain hmun hrang hranga cheng Mizote a khawih dan te leh a hla miten an hlut dan tawi deuh hlekin i lo zir teh ang.

A Chanchin Tlangpui

Pu Thangluaia chu Mizoram khawchhak lam Khuaihnuai khua (Sialhawk bul, tunah chuan a ram tawha) cheng ṭhin, Sawlengah a pem hnuah Aizawla lut a ni a. A nupui Zaliani nen fa an dam thei lo hle. Ni 20 February 1914-ah fapa an hring leh a, an lawm em em a. An kawmthlang zawlnei pitar chuan, "He nausen hi chu fa ro tur, nu leh pa chawm tur a nih hi, chuvangin a hmingah ROKUNGA sak tur a ni," a ti tlat mai a. Chu chu a pu hlen ta a ni. He zawlnei pitar hian a sawi dik ngei mai, fa ro chang a ni lo, Zofate tana rotling a lo ni ta hial zawk.

An chhungkua hi an rethei viau a, inhlawhfa chung leh hlo thlo chungin lehkha a zir ve ṭang ṭang a, Aizawl Sikulpui aṭangin Lower Primary chu kum 1927 khan a zo va, 1929-ah Middle a passed leh a. Kum 1934 aṭangin Loch Printing Press (tuna Synod Press ni ta)-ah a thawk ṭan a. Kum 1935-ah Zamawii nen an innei a, fanau malsawmna an dawng hle. Venghnuai aṭangin kum 1934-ah Mission Vengah an insawn a, 1945-ah Kohhran Upa atan thlan a ni.

Kum 1966 February thla khan Durtlang damdawi inah a rilphir an zai a, a chhuah hnu kar khat lekah Zoram a lo buai tak avangin Lunglêngah an raltlan ve a. Aizawla an luh leh hnuin ni 18 April 1966-ah Bilkhawthlir lamah an raltlan leh a, thla thum vel an khawsa. Aizawla an luh leh hnu chuan a hna ngaiah a bur leh ta.

Kum 1969 July ni 9 aṭangin a damsam mang lova, damlo satliah mai a ni rih a. Zual lutuk pawha a lan loh laiin ni 12 July 1969 tlai lamah chuan nikhaw hre mang lo khawpin a awm ta thut mai a, chumi zan dar 10:15 velah chuan Zofate tana Pathian thil thlawn pek Rokunga chu van arsite anga êng tur leh, Zofate tan a hlate hmanga thu sawi zel turin a tawlh liam ta a. A tuk ni 13 July 1969-ah ama inah leh Mission Veng Biak Inah ropui taka vui liam a ni.

A thih thu hian Zoram dung leh vang a fan chhuak thuai a, YMA Branch hrang hrangin Signal-in an inhrilh chhawng zel a, sunna inkhawm an buatsaih zel bawk a. Ani tluka Mizoram pum leh Zoram khawvelin phut luihna tel hauh lova anmahni rilru puakchhuak ngata an sun hi a awm lo hial awm e.

A Mizia

Rokunga hi pa lian lo tak, feet 5.3"-a sang, ngo tak, hmelchhe lo tak a ni a, a zâng erawh a kul deuh. Rawng thianghlim, lar si lo, a var leh a var-eng (cream color) leh uk-buang dal lam hi a duh zawng a ni a. Pa inchei fai peih tak a ni.

A naupan lai aṭangin mi zakzum leh nunnem, thuawih thei tak, mi khawngaih thei tak a ni. Mi anglo leh piangsual leh rualbanlote a lainat thei hle a, a ṭhianten an chhawmchhaih a, an hmusit deuh ṭhinte pawh ṭha a ti lo hle ṭhin a, a ti ve ngai lo. Sava pawh a perhthla ve lo va, a awk bawk hek lo. Rimawi leh zai te, lemchan te hi a ngaina hma hle a, guitar tum te, violin nawh te, phenglawng tum te a thiam hle vek.

Mi inngaithlawm tak, aw nêm lam, nu si lo, a kamchhuak pawh ngaihthlak hahdam leh mi chaldelh lo tak a ni a, a thil duh loh zawng pawh sawisel zen zen lo, a ṭha zawnga thil thlir mi a ni. Pa âwm nêm tak, a hmel ena zuamawm tak a ni a, a rilru erawh chu khauh tak a ni; drama-a hmeichhe lema chan leh an thawmhnaw inbel hlek pawh duh miah lo a ni thung. Mahse hriatthiamna ngah, pa zua, rilru lian tak a ni.

A fate chu rinawm turin a zirtir ngun hle a, "Eng hna pawh thawk ula, rinawm taka in thawh phawt chuan in hlawhtling ang," a ti ṭhin. Tin, "Bel pawp chu a chung lam aṭanga en aiin a hnuai lam aṭangin a lang chiang zawk," a ti a, hei hi mihring mize dik tak chu an chunga mite lakah ni lovin, an hnuaia mite lakah a lang chiang ber tih a sawi duhna a ni.

A Hlate

Tuna kan hriat theih chinah chuan Rokunga hla hmasa ber chu, "Van hnuai khawvel sakhming chhiarin" tih hla kum 1939-a a phuah hi a ni a. A hla hnuhnung ber chu, "Sualin bo ma hila," tih hla, 7 May 1969-a a phuah hi a ni thung. Tichuan van ropuina haa a her liam hma ni 67 thlengin hla a phuah tihna a ni.

Rokunga hian tuna kan hmuh theih chinah chuan hla 129 a phuah a (Mizo hla leh a phuahte, 1999, p. 392-393-a hla 126 tih leh, Rokunga hlate, 1999, p. iv-ah hla 128 phuaha kan ziak kha, kan hmuh belh zel vang a ni e). Chungte chu a tlangpuiin Kristian hla 55, hetah hian Krismas hla 20 a tel nghal a; khuarel (nature) lam hla 22, ram leh hnam hla 14 leh hla chi hrang hrang 38 tiin a ṭhen theih a, chik lehzuala zir chuan hei hi siamṭhat a ngai mai thei e.

A hla tam ber hi chu am ar-âwm chhuak liau liau a ni a, ṭhenkhat erawh hi chu miin an ngen avanga a phuahte a ni hlawm. Tin, miten an hla phuah a thluk an siamtir te, hla awmsa harmonised-a a dah te pawh a ṭhahnem viau. Rokunga hian tui lian luang ri hum hum te, âr khuang te leh thli thaw vuk vuk te hian thu leh hla rawn hrilhin a hre ṭhin a, chung aṭangte chuan hla leh a thluk a chhar ṭhin a ni.

A hla siam dan tlangpui ber chu, ngaihtuah lawk pawh awm lovin mut dawnah te, mut hnuahte a lo lang thut a, chu veleh a tho thut a, khawnvar a chhi a, a chhungte mut reh vek hnuah a ziak ngat ngat ṭhin. Lungleng thei mi a ni a, a nazawngin hla a phuah zung zung lo a, a thinlunga hla lo kal huna phuah ṭhin a ni zawk. Hla thu har leh un pui pui a hmang lova, mi tinreng leh naupang deuhte pawhin an hriatthiam theih tur chi leh ngainat zawng takin hla thu mawl leh tluangtlam a hmang a, hriat a awlsam a, a mawl a, thu thuk leh ril a sawi pha tho lawi si. Tin, Mizona leh Kristianna hi amahah rem takin a inchuktuah a, chuta ṭang chuan hla a phuah ṭhin a. Chuvangin a hlate hian mi zawng zawng sak a hlawh a, mi dang dah hniamna ni lovin Mizo hla phuahtu zingah Rokunga tluka hla sakpuitu ngah an awm lo hial awm e.

Amah ngeiin "Hla siam dan" a ziakah chuan, "Hla mawi taka rem khawm (hermonised) tur chuan major chord hi hriat thiam hle a ṭul a...Piano dan hi a kalh tur a ni lo...A form siam dan te pawh hian dan mumal tak an nei ve thliah zel..." a ti a. Tin "Ṭawng ri hian thluk a nei a, chumi thluk zuia hla thluk siam hi a sak a hahdam," a ti bawk.

Rokunga hian Solfa hi a thiam viau a, mahse zirna a neih hriat a nil ova, certificate a dawn pawh sawi a awm lo, a tui avangin amahin a zir a, a inhai hawng chawp a ni ber awm e. A hla kalhmang leh a thlukte hi a rilrua lo piang ve mai a ang hle a. Zofate tan Pathianin talent ropui takin a rawn thuam ve a ni e ti ila, a dik ber ang e.

Rokunga Hlain Zofate A Khawih Dan

In ropui chuan sir tam tak a nei ṭhin a. Chutiang deuh bawk chuan Rokunga hlate pawh hian sir tam tak neiin kil hrang hrang aṭanga zir leh chhui tur a awm a. He lehkhabu têah hi chuan kan sawi seng dawn hauh lova. Zofate a khawih dan tlem i lo en teh ang.

1. Kristianna Mizorama a lo luh khan, Kristian hla lehlin hna Zosapte khan an thawk nghal a. A bu an chhuah a, an belh zel a, kum 1919-ah phei chuan hla 558 chuanna chhut vawi 10-na a chhuak hman a. Kristiante chuan Mizo hla pangngai zawng zawng an hnawl vek a, sak an khap bur bawk. Mahse nula leh tlangvalte chu Kristian hla ngawt chuan an lunglenna a thawidam zo lova, an inkara induh tawnna leng vel a hril bawk lova, an tuihalna a fah zo hek lo.

Chuvangin kum 1917 aṭangin "Kaihlek hla" an phuah ṭan a, chu chu Kohhranin nasa takin a do va, mahse a puang zel tho. Kum 1925 vel aṭangin "Lengzem hla" a lo chhuak leh a, hei pawh hi Kohhran chuan a lawm vak lo tho mai. Tichuan Kaihlek leh Lengzem hlate chu ṭhalaiin an tuipui em em a, Kohhran thikthu a chhe bawk si. Kum 1930 chho vela nula leh tlangval boruak tawn chu a chep a, thaw ipikthlak em emin a lang.

Kum 1940 chhoah chuan hla pawi sawi lo, khawiah pawh, tu bulah pawh sak rem, ram leh hnam leh Mizo nun phuahna hla a lo chhuak ta a. Chung zingah chuan Rokunga hi a thawh hlawk ber a tih theih a. Tichuan nula leh tlangvalte tuam churh a, uap tlattu boruak chu Rokunga leh Mizo hla phuahtu dangten an rawn vaikiang ta, an thaw a ta veng huai mai. Chuvangin Rokunga hi heng hun laia nula leh tlangvalte nun, rilru leh awm dan thawidamtu a ni e ti ila, kan uar a ni kher lo vang.

2. Kum 1890 aṭangin British-in min awp ṭan a, sikul an hawng a, Mission hna leh zirtirtuah ṭhenkhat an lut a. Sawrkar hna tlem azawngah an lut bawk a. Sipai ṭang an awm nual bawk a, chungte chuan khaw khat nula hmelṭha an thur nalh nalh a. Zawlbuk a tlusawp a, khawtlang nun leh inrelbawlna a nghing a, nunphung a inthlak nasa. Dr. R.L.Thawnmawia sawi dan takin, "Tualtah kawr kan pawt thler a, khawl tah kan chawi a; vaibel dawn kan seh keh a, lehkhaziak kan pet kawh a; thlanvawng thleng kan khaikhup a, darthlengah chawhlui kan kil ta a ni" (Thu leh Hla, September 1995, p. 2)

Tichuan Mizote eizawnna ber hlo thlawh leh kut hnathawh hrim hrim chu mi tam takin kan ngainep a, kan hmusit ta hlawm bawk. Chutiang kawnga Mizo hnam piangsual mai tur chu Rokunga hian a lo hmu ru khiau va:

Vawiin chuan ram ṭuan kan rel a, vangkhaw zauvah,

Lawm lungrual kan ngir e, chhuahtlang mual mawiin;

tiin hnathawk tura inlawmho nula leh tlangvalte dinhmun chu nuam tak leh hlimawm em emin a sawi ṭan a.

Lawm lungrual hlim thawm nui ri nen,

Turnipui kan do dai;

an tih thlen meuh phei chuan, hna nuam ber pawl ni awmin min hmuhtir a.

Kan sawmfang mual lian pui,

Thinlai riang min hnemtu;

Thliten rawn chhem an fawn dim e,

Lawm lungrual dung an thul.,

ti teh leh,

Hah chhawl dawi ang min dawm turin,

Lengin tui rawn chawi e.,

an tih ngat phei chuan hlo thlawh leh kut hnathawh hi hlimawm hliah hliah, hna azawnga nuam ber ni hial awmin min kawhhmuh a ni. An khawsak dan mek leh an hnathawh mek chu hmusit lova, hlim taka thawk tur leh lungawi turin a fuih sauh sauh a:

Turni sa, khuangruah sur, thosi karah,

Hah takin thawkrim mah ila;

Mizo kan ni alawm kan hlim ang chu...

a ti deuh deuh a, "Hlim rawh u, nui rawh u," a ti lawm lawm zel a. Hengte leh a hla dangte hian hlo thloa eizawng mek nula leh tlangvalte chu a chhem harh sawng sawng ang a, a tinuiin a tihlim hle tih kan hriatpui ṭheuh awm e. Chuvangin Rokuang hlate hian Zofate hennah kut hnathawh ngaihsan tharna a pe a ni.

3. Pi leh pute hun aṭanga kan neih Mizo tlawmngaihna hi a chhuanawm hle a. Mahse inawpna thar Mizoramah a lo lut a, sakhaw thar a lo tawlh lut bawk a, nunphung a inthlakthleng nasa a. Chuvangin tlawmngaihna pawh a chuai ṭan mai dawnin a lang a, a tivultu ber Zawlbuk lah a tlusawp tawh si a. Rev. Saiaithanga chuan, "A lungphum, a innghahna chu thil pahnih - Kohhran leh Sawkarin a nawr phet a...bel chhuan hi so se ti hle chungin a hnuai mei ṭhelh ila, chutiang thaw chu a ni... a bo lo hi thil mak tak a ni," a ti a. (Mizo Kohhran Chanchin, p. 144-45)

Hetianga Mizo nuna sutpui ai maha pawimawh, tlawmngai hnama inngaite chuan an nun chelh dingtu laipui tlawmngaihna chu an hnam nunah a mit dawn suar suar tawh a tih theih a. Chu thil pawi tak mai chu Rokunga chuan a lo hmu reng a, chelh din a, tihvul leh tumin hlain Mizo nula leh tlangvalte chu a han zâp ta a:

Kan tlang, kan ram a hring a mawi,

Tlawmngaihna pangpar mawi a vul;

Rangkachak leh lunghlu aiin,

Chu pangpar chu a mawi zawk e.,

a rawn tichhuak phawt a:

Ka chawi ang che sakhming hluanin,

'Zo nun par mawi' ka ti ang che;

a han ti leh a, kan ta liau liau angin min hmuhtir a, kan rilruah a tuh a. A hla thunawnah chuan chelhdin tum leh tihvul leh rilruk em emin, uar lehzual hian:

Aw tlawmngaihna hlu, aw, nunna par,

Kan tlang ram nuam hmun sangah hian;

Kum sang tam tak pawh ral mah se,

Zamual liam lovin ding reng rawh.,

timeuhin mittui nen a au va, a ropui ngei mai. He hla leh a hla dangte avang hian Mizo chu tlawmngai turin kan indah a, khawlaia zu ruia let reng leh damdawi ruia mu reng pawhin chu ngaih dan chu a vawng a, tlawmngai turin a inngai a, Mizo hnam chu tlawmngai hnam niin a hmuh phah a tih theih awm e. Mizo tlawmngaihna chuai lek lek tawh chu Rokunga hlate avangin a lo vul thar leh a, Zofate thinlungah vawiin thleng hian a insawh nghet ta deuh deuh a tih theih awm e.

4. Krismas hla 20 lai a phuahte hi he lehkhabu tê-ah hi chuan kan zir kimchang hman dawn lo a, a rundal lekin i lo sawi teh ang. Krismas boruak a hlimawm thei ang bera a han chhaih vel ngawt pawh hian ṭhalaite rilru a chawk nung thar ṭhin a:

Kan ngaih Krismas ni eng a lo zam thar leh ta,

A mawi tizualan Bethlehem par nen,

A lo vul ta e par ang kan lawm.,

a tihte hi Krismas thlen dawn chuan sak hmaih phal a ni ngai lo.

"Bawng in run pui a bel" tih thupui hmang Krismas hla a phuah thar thu, a kawmngeih tak Pu F. Sapbawian a hriat chuan ṭha lo hlein a ring na a, Rokunga Krismas hlate zinga sak hlawh ber pakhat leh, sawi ril ber pawl a tih theih a.

Ka thinlung ram Kaisar lalnaah hian,

Bethlehem tlangpui rawn din la,

I tan ranthleng rawn hung leh la,

Tah chuan lo cheng ang che.,

tih hi chu chhuanawm tak a tling. Engpawh ni se, Rokunga Krismas hlate tel lo chuan ṭhalaite hian Krismas an hmang thei lova, a tel lo chuan a kim lo riauin a hriat a. Chuvangin Rokunga hian Krismas boruak a zap nung thar leh ṭhin a ni ber mai.

5. Mizo tlangval rual 2100 lai chu kum 1917-a France ramah an kal a, sap nula leh tlangval hmelṭha pui pui an hmu a. Lehkha zirin tlangval eng emaw zat Zoram pelin an thawk chhuak a, hnam dang pumraw ṭha leh dawlh kai ṭha tak tak an kawm a, an hmelṭhatzia an sep rawtui a. Sipaia lut Mizo tlangvalten chutiang deuh bawk chuan an sawi fo bawk. Chuvangin Mizo chu hmelṭha vak lo, tê si, chawn sek leh hmuhsit awm tak niin kan inhre dawn ta mai a.

Hetih lai tak hian Mizo nihnna lungawi tlat leh an hmelṭhatzia hmu thiamtu Rokunga a lo che a:

Mizo kan nih kan lawm e,

Kan tlang a thiang bawk si;

Kan rilru pawh a sang e,

Kan hming a thang bawk si.,

a rawn tichhuak ta phawng mai a. Chutah ngawt chuan Zofate tana a 'vision' chu a la tawp lova, a ṭhan a la kin hek lo:

Mizo kan ni - kan hmel a ṭha,

Kan tum a sang bawk si.

Chutin kan hmingthan mawina chuan,

Khuavel a deng chhuak ang.,

a la ti ta deuh deuh thei maw le. "He hla hi chu kan Zosapte pawh khan an lawm vak lo," tiin Pu Chawngzikan a sawi (YMA Diamond Jubilee, 15 June 1995, Vana Pa Hall-ah).

A thuziak pakhatah Rokunga hian, "...Chutah zet chuan Mizo dik tak, tlangval hmelṭha ka hmu ta..." a ti a ("Mizo tlangval a ni, p. 1"). Hmun dangah pawh, "Chutih lai chuan 'hmalai chawlh' an ti a, thing hlimah an ṭhu khawm a. Nulate lah chu an tai sen tak ṭit ṭet a...Dari chuan tui chu a han sem a, tlawm an ngaih hlawm em avangin a in hnuhnung ber nih an tum ṭheuh si a, an tih dan te chu a va mawi tehlul em! 'Mizo kan ni kan hmel a ṭha,' tih hla kha han sa dual dual atan ka it ngei mai.

E khai! Chu, vau ngaw kara chu vazar rual an ni awm mang e, 'Mizo kan ni kan hmel a ṭha,' tiin an zai dual dual mai. A! An nui ri ve hawm hawm mai. Vazar rualte pawh Mizo an lo ni reng mai alawm mawle.

A tawpah chuan tlangvalin an han in hmasa a, nulaho nge nge chuan an in hnuhnung ta; mipa zah dan an thiamin tlawm an ngai teh tak e aw! Mizo hmel zawng a ṭha teh tak asin maw!" ("Lo neitu," MZP, September 1953, p. 11-15).

Sakhming chul lo Rokunga rilruah chuan Mizo nula leh tlangval hmel a ṭha a, lawm lungrualte pawh 'Mizo kan ni kan hmel a ṭha' ti dual dual turin a duh a, vazar rual tak ngial pawh chu hla chu sa dual dualin a mitthla a, an thawmte pawh Mizo nula leh tlangval ri niin a ngaihruat zel zu nia. A rilru chhungril berah hian, 'Mizo hmel zawng a ṭha teh tak asin maw' a tithlawt mai zawng a ni e.

Engpawh ni se, Rokunga suangtuahnaa Mizo chu an hmel a ṭha hliah hliah a, a sâng a, a hmingthang a, an tum a sâng a, an hmingthan mawina chuan khawvel a deng chhuak a ni; chu chu a rin dan a ni a, a thlir dan a ni a, a suangtuah dan a ni leh a, a duhaisam, a 'vision' a ni, a ropui elh elh ngei mai.

6. Mzoram hi hla phuah thiam ṭhenkhat, Vankhama (1906-1970) chuan "Rimawi ram" tiin a vuah a; Damhauha (1909-1972) chuan, "Lunglenna ram, thing tinin zûn an phurh vekna khawtlang lii liai" niin a sawi a; Liandala (1901-1980) thung chuan "Pangpar huan, par tinrengte an vul chûkna" niin min hrilh. Rokunga hian engtin nge a hril ve le?

France ram kal te, sipai ṭang te, lehkha zira Zoram pela vak chhuakte leh tlema ram fang zau deuhte chuan Mizoram hi ram chhengchhe tak, hmunzawl reng reng awm lohna; hmun hrehawm leh sitawm takin an sawi fo. Tun hma deuh phei kha chuan thlawhna tê ber chi Vydoot chauh thlenna, Silchar kawngpui chauh nei, kar khat emaw ruah a sura ṭam hlauhawmna ram niin an hria a, he rama chen ve hi vanduaithlak thei dawn hialin an titi ṭhin.

Rokunga erawh chuan mi tam berin an hriat thiam loh a hre thiam bik a, an hmuh thiam loh chu mit var bik takin a hmu tlat bik zu nia. Chuvangin hlaah mawi takin a chaiw a:

Aw Zoram nuam i hming a mawi mang e,

Kan pi leh pu mi ṭhate lo pianna;

I tlang, thing zar, thlifim, i zo tui thiang reng hian,

Rilru sang tak leh nun mawi tak min pe.,

tiin ngialngan deuh takin min hrilh phawt a, ngaihnobei lehzualin:

Lentupui kai vel leh romei chhumin,

A bawm kan Zoram nuam leh duhawm;

Awmhar tinkim dawna han thlir velin,

A mawi zual Zofate kan lenna.,

a han tih meuh chuan Mizoram cheng ve nih hi vanneihthlak hliah hliahin kan hria a, "Vul reng rawh ka pianna Zoram nuam" tih chham thlen meuh chuan Mizorama piang ve nih hi nihhlawhthlak veng vengin kan inngai thei ta.

Kan Zo tlang ram nuam hi chhawrpial run i iang e,

Hal lo ten lungruala dar ang kan lenna,

Perhkhuang, ṭingṭang zaia kan chawi lai, i mawi e,

Par mawi tin reng leh thlifim lenna kan Zoram nuam.,

tih hlain Zofate chenna zawng zawng a denchhuah dan phei hi chu chhui tham a awm a, a fan zau a, a zâm rei a, a chiah hneh hlein a lang. Tu chhan tur emaw ni chuang si lo, zawhna hmanga uar taka chawiin:

Hei ang ram nuam reng hi ram dang awm ve maw,

Auvin hril vel ila, khuavel hnam tin zawtin,

Hei ai ram nuam zawk hi awm chuangin kan ring nem maw.,

a la ti ulh ulh thei a ni. A thunawn mawlh hian Mizoram a sawi duhawm a, a puang nalh takmeuhin ka hre ṭhin:

I mawi em e, kan Zoram hmun sang,

Fiara tui thiang kan dawnna;

Tlang tin thing tin zar mawi leh romei a zam karah,

Tlang tin zaleng zawngte lungrual kan insuih khawm,

Aw, i mawi chuang mang e, kan lenna Zo tlang ram nuam.,

Chittagong Hill Tracts te, Tripura te, Manipur te leh Burma rama khawsa Zofate pawhin he hla an sak apiangin Mizoram hi an mitthlain an hmu a, an rilruin an cheng a, tlawh an chak a, zin ve ngei an duh hliah hliah ṭhin tih kan hria. Rokunga hlain Zofate rilru a hnuh khawm dan hi a ril a, a thuk a, 'Mizoram' a tih pawh hi eng anga zau nge a nih a, eng ang chiah nge a huam tih sawi theih mai a ni lo, hunin a la hril mahna.

Mizoram Bawrhsap S.N. Barkataki, kum 1951-52 chhung Aizawla ṭhu pawh khan a duh hle a, vawi khat chu a Bangla-ah Party siam a, hla an han sak chuan, "Kan Zotlang ram nuam tih kha i sa ang u," a ti a. An han sa ta a, vawi tam tak an sak hnuin hla dang an han sa ve a, vawi khat bak an sa thei lo, "Kan Zotlang ram nuam tih kha le," a ti zel mai a, an sa tlaivar ṭhak mai a. Chumi ṭum zet chuan a phuahtu ngei pawhin 'ka kham deuh hial' a ti a ni.

Rokungan 'Chhawrpial run' a hmang hi ṭhenkhat chuan a hmun an zawng a, hrilhfiah an tum ṭhin. Islam sakhaw betuten an beisei ram 'Hlimna huan' (Garden of delight) te, Vaihovin tar theih tawh lohna hmun 'Sangrila' an sawi te leh, Cowboy-ho mangphan ṭhin 'Eldorado' ram ang deuh a ni a, hrilhfiah a ngai lova, a awmna lai awm dap a ṭul hek lo, Rokunga mitthlaah a awm a, a suangtuahnaah a piang a, Zofate thinlung ramah a châm hi a tawk a ni.

7. Rokungan 'Mizo hnam' a sawi dan mawlh hi ngaihnawmin ka hre ṭhin. 'Mizo' tih tak hi a hlaah hian a hmang tam lo hle a, 'Zoram' tih erawh chu vawi 20 aia tam mah a hmang a, 'Mizote' sawi nan symbol anga hmang a ni deuh ber.

Mizote zia leh inthuamna tura Rokungan a duh ber chu dikna te, rinawmna te leh huaina te a ni a, chu chuan a hla tam ber chu a kap chhuak chiai a tih theih.

I ram leh i hnam tan ding nghet la,

Thih thleng pawhin rinawm zel la;

Huaina, dikna, rinna vawng ṭha la,

Tho la, i kein ding rawh.,

timeuhin a lo au va. Hmun dangah pawh:

Rinawm leh huaina hi

A chul thei lo;

Mahni hmasial loh hi

A mawi ber fo;

Chutin kan ramah zung kai se,

Ṭhang lian zela sang zelin.,

a ti zel tih kan hmu. Chu dikna, rinawmna leh huaina te chu amah ngawta lo awm anga sawi phei zawng a ni lo, innghahna lungpui nghet tak a hmu a, chu chu Pathian a ni tih a hlaah chiang takin a puang a:

Kan ram rorelna pawl hi,

Ropui an rel hun;

Rinawm leh huaina pe la,

Thudik humhim turin.,

a tin ngat a. Kum 1947-a Central YMA-in 'Hnam Hla' inphuahsiak a buatsaih ṭuma lawmman pakhatna a dawnnaah pawh "Ro min relsak ang che" tih hi thupuiah a dah kher a, hei hian Mizo hnam pum tana a ngenna leh a duhaisam a tichiang hle a:

Chuvangin aw kan Pathian,

Hei hi kan dil ber che,

Kan ram, kan hnam min hruaian,

Nang chauh kan thlang a che.,

a tithiam leh zelte hian Mizo hnahthlak pum tana a rilru chu Pathiana innghah a ni tih khawlaia sai kal tlukin a fiah. Chu hnam chuan a thlir tur chenin a kawhhmuh a:

Leng dang hneha rual khumin,

I hnam tan ṭhahnem ngai la;

a han ti tê têa, duhthawh lehzualin:

Raltiang ram saw thlir the u,

Hriatna, thiamna, finna ram saw;

tiin kawng a kawhhmuh ruah mai a ni.

Rokunga Hla Mipuiin An Hlut Dan

A thu ṭha tak, a ṭawngkam hman pawh ṭha fua lang, mahse mipui sak hlawh lo, nung lo riau hla a awm thei a. Chutiang kawngah chuan Rokunga hla chim chin tlem i lo en teh ang.

Siamkima chuan, "Rokunga hi Mizo ṭhalaite hla sak tur petu, mi malah chuan amah tluka ṭhalaite lungrual tak leh hlim taka zaitir theitu hi kan hla phuahtute zingah hian an awm lo vang...'Lentupui kai vel leh romei chhumin' tih chang khatna leh thunawn han sak hi chuan Mizoram nuam tihna leh inngaihtuah lungawina rilru thar min neihtir leh ṭhin a. Ngaihruatnain Mizoram dung leh vang min fantir ṭhin a; Phawngpui tlang te, Chawngleri puanthin tlang te, Champhai zawl te, Hmuifang tlang te, Mawmrâng tlang te, Lurh leh Ṭan tlangte leh Mat leh Tuichang luite kan rilruin kan hmu ṭhin," a ti a (Zalenna Ram, p. 50-51).

Dr. R.L. Thanmawia pawhin, "Rokunga hla khawikhawmna chu hawrawp mal pali, 'MIZO' tih hi a ni. Mizo nun mawi tak hi a ngaisang a, Mizo nihnaah a lungawi a, hmasawnna kawngah tlan zel se a ti a, a sanhmawh a; muthlua a hmuhin auh harh a tum a; natna a veite tihdam tumin theihtawpin a bei ṭhin a ni," a ti. Khawl in (Press)-a a thawhpui kumkhua Pu Bawiṭhuama (RIP) chuan, "Mizo tih ri hi a bengah a mawi bik a, hmangaih pawh a hmangaih bik niin ka hria" tiin a sawi. Pu C. Rokhuma pawhin, "Mizo nih a nawmzia te, a lungawithlakzia te a sawi ṭhin a, Sap nih a chak miah loin ka hria," tiin ngaihnawm takin a ziak (Thu leh Hla, September 1995, p. 1).

Zikpuii Pa phei chuan a phuh chhuak chhah zual a, "Pu Rokunga rilruah chuan 'Mizo' han tih hian dikna, huaisenna, rinawmna, tlawmngaihna a kawl nghal a; tlangval zawng zawng hi 'Vana Pa' an ni a, nula zawng zawng hi 'Chhingpuii' an ni ta vek mai a. Hmasawnna leh finna êngin chutiang pasalṭha leh nusalṭha a han thin chhuah, khawvel dâpa an han darh tur chu a mit tlo hian a lo hmu a...Pu Rokunga hi Mizo hla phuahtuah chuan ka dahsan ber a la ni...chuvangin Zofate Zofa an nih chhung chuan Pu Rokunga hi Pu Rokunga a ni mai awm mang e, ka ti ṭhin," a tihlawl mai nia (Zikpuii Pa Kutchhuak, p. 81, 84, 89).

Ni 26 July 1969 khan Central YMA chuan Rokunga sunna inkhawm buatsaihin amah an ngaihsanzia puan chhuahna lehkha ziak mawi tak an pe a. Chutah chuan, "Hla phuah thiam, Ṭhalai ṭhian, Pathian rawngbawltu rinawm leh Ram leh Hnam hmangaihtu, Mizo hnam pumpui ngaihsan leh ngainat em em..." tih hi a tel a. Ngun takin han chhiar nawn ve teh mah, "Mizo hnam pumpui ngaihsan leh ngainat em em" ti khawpa Central YMA meuhin mi dang an chawimawi hi vawiin thleng hian kan la hre ngai lo; he thu hi a chuangtlai lova, an uar a ni hek lova, a hleihluak bawk hek lo, hnam pum aiawh ṭawng chhuak awm takin, a hmanna hmun takah, an ṭawngkam dawng awm ber hnenah an sawi a, an puang hi a inhmeh em em a ni. Hei hian Rokunga YMA leh Mizo mipuiin an hmuh dan a tarlang chiang ber awm e.

Kum 1951 hma lam hret kha a ni mai thei, Rokunga hla 'Kan Zo tlang ram nuam' tih hi Assam Regiment hovin March Past hla atan hman turin Rs. 300/-in lei an dil a, mahse a hralh phal lo. Kal rem hla atan sak a phalsak ta zawk a, lawmmanah Rs. 10- an pe a. Hei hi thuthang dik lo, 'a hralh' tiin an sawi lar viau a ni awm e, Zosap Pu Samela (Rev. Samuel Davies, 1937-1951) beng a thleng a, Rokunga chu a kova, "Enga tinge min râwn loh, chhungkaw dinchhuahna tham pawisa i dawng thei alawm," tiin a hrilh a. Mahse thil awm dan dik chu Rokunga chuan a hrilh ve ta zawk.

India President chenna Rajtarpati Bhavan, Delhi lailia awm bulah Pu Lalbuaia (Ex-MP, 1977) chu zingah a leng vak a, sawrkar laipui Secretariat bul hmun zawlah chuan sipai 50 rual vel tur hi an lo lâm a, baja leh khuangin an awi a, an lo nghing suau suau va. A va hnaih chuan, "Kan Zo tlang ram nuam hi chhawrpial run i iang e," tih hla hi an lo tum a. An hla tum chu an thlak a, "Lentupui kai vel leh romei chhumin," tih an han sa leh ta a...President in lam hawi chuan an kal ta suau suau a, "E khai, hlim rawh u, nui rawh u," tih kha an han sa zui leh a, an lawi lut ta a..."An lan theih chhung zawng chu ka thlir reng a, ka lung a tilengin Rokunga min ngaihtir ta em em mai a," tiin lungkuai takin Pu Lalbuaian a sawi (Zonunmawi, 5 June 1999).

Kum 1995 June ni 13-14 khan YMA chuan Diamond Jubilee an lawm a, Rokunga chawimawina hun hman tel a ni a. Hetianga mimal hla phuah bik hmanga intihsiakna hi Mizoramah a awm vawi khatna a ni.

Mizoram rorelna sang ber Assembly-ah, ṭan dawn leh ban dawnin music mawi taka rem an tih chhuah ṭhin chu, Rokunga hla phuah 'Aw Nang kan Lal kan Pathian' tih a ni a, a hmun leh a hun nen a inhmeh em em a, kum 1999 kum tir lama ṭan a ni nghe nghe. Hei pawh hian Rokunga hlain ngaihhlut a hlawhzia a tilang hle.

Rokunga hla phuah ṭan kum aṭanga kum 60-na, a thih aṭanga kum 30-na a lo thlen meuh chuan, Rokungan Mizote tana a thawh hlawkzia leh hlutzia hretu mi ṭhenkhat chuan "Rokunga Memorial Committee", ni 22 March 1999 khan an din ta hial a. Chu Committee chuan zirna in hrang hranga Rokunga Memorial Lecture neih te, Rokunga Hla Kut huaihawt te, Rokunga Hlate a bua chhuah te, Rokunga Lungdawh buatsaih a, Rokunga lim mawi tak dah te an tum a, hengte hi tihhlawhtlin mek a ni. Mak ang reng tak chu, he Committee mi 13 lai awmnaah hian Rokunga mit ngeia hmu chu pakhat chauh a tel a, chuvangin a kutchhuak ngaihhlut vang liau liaua intel khawm tih a chiang hle.

Tin, Millenium Celebration lawmna inkhawm, ni 12-13 January 2000-ah A.R. Lammuala Zaipawl 2000 rualin an sak tura thlan hla 3 zinga pahnih chu Rokunga phuah, "Aw Nang , kan Lal kan Pathian" tih leh, "Hunte an inher liam zel a," tih a ni a. Pakhat dang chu "Haleluia chorus" a ni. Hei ngawt pawh hian Rokunga hlain mipui ngaihsan leh hlut a hlawhzia a puang chiang ngawt mai.

Aw le, a sei lutuk a hlauhawm deuh avangin duh tawk dawn tawh mai ila. Rokunga hlaah hian zir chian atana ṭha leh chhui zau tur a ṭhahnem hle a, a hla mal a bika thlur tham, "Ka pianna Zawl khawpui" tih te, fahrah rethei chungchang lungkuai taka a phuahna, "Hringhniang hrai chawi te, i lo piang a," tih te, nu pawimawhzia leh an inan loh theih dan a sawina "Chunnemi" leh hla dang a tam hle, hun remchanga chaiah i khek rih mai ang aw.

Rokunga hla hian ṭhalaite thaw-ipik taka awm chu a vaikiansak a, a thehvensak bawk a; nula leh tlangval tan hla sak tur pe tam ber a ni a; lungrual taka Zoram timawitu angin ṭhalaite chu a hmu a, ram leh hnam hre renga hna thawk sauh sauh turin a duh a, thih thlenga rinawm tur leh, tlawmngaihna, huaisenna, dikna leh rinna vawng reng turin a ngen a; a ṭul chuan hrehawm tam tak pawh tuar huam turin a fuih a; raltiang ram - hriatna, thiamna, finna ram thlir zel turin Zofate a kawhhmuh a, inunauho dial dial tur leh ram hmangaih turin Mizo hnahthlak zawng zawngte a hla hmangin thui tak a hnehin a lang.

A hlate avang hian Mizo nih a nuam a, a hlimawm a, a chhuanawm bawk a.Chu chauh a la ni lo, Mizoram pawh hi a duhawm a, a mawi a, a ngainatawm a, a chhunga piang leh cheng nihte chenin a lungawithlak hliah hliah a tih theih hial. Mizo hnahthlak zawng zawng ti Mizotu, Mizo nihnaa lungawi taka hruai khawmtu leh hnuk khawma kuah khawmtu chu Rokunga hlate hi a ni e ti ila, kan uar a ni kher lo vang.